Os Trintas de Trives

Os Trintas de Trives foron un cuarteto de gaita, clarinete en mi b (requinto), redoblante (caixa) e bombo, creado por iniciativa do compositor Ricardo Courtier a finais do século XIX na localidade ourensá de Pobra de Trives e formado polos irmáns Félix, Fermín, Rogelio e Luís Álvarez.

No seu tempo foron aclamados tanto polo público como pola prensa que se facía eco das súas actuacións por toda Galicia e as súas saídas a Madrid, Barcelona ou La Habana, sendo considerados un dos máis importantes grupos de música popular galega do momento.

Os Trintas son un grupo diferente ao que se pode considerar hoxe en día unha formación de música tradicional, xa que os seus compoñentes son músicos formados que tocan con partitura e o seu repertorio está composto especialmente para eles por un autor recoñecido (R. Courtier), que mestura melodías populares galegas e ritmos de moda no momento como a mazurka ou o vals con arranxos de obras máis “serias” de compositores como Juan Montes, José Castro “Chané” ou Federico Chueca.

O éxito da formación vese tamén reflectido na gran cantidade de cuartetos con clarinete que van ser creados por todo o territorio galego nos anos seguintes á súa aparición e que converterán a esta combinación instrumental en agrupación tipo da música galega ata a aparición dos cuartetos con dúas gaitas, cara o ano 1925.

Na actualidade existe un crecente interese pola recuperación da historia da música dos Trintas de Trives que está a ser interpretada por músicos da talla de Vaamonde, Lamas e Romero ou Marcos Foxo, entre outros.

Traballo levado a cabo por:


Fernando Abreu

Clarinetista galego de sólida formación académica e ampla e variada experiencia profesional. Titulado en clarinete polo Real Conservatorio Superior de Música de Madrid e na interpretación de clarinetes históricos polo Koninklij Conservatorium de A Haia (Holanda), está tamén especializado en Música Tradicional Galega pola Universidade de Santiago de Compostela.

Como intérprete ten participado tanto como solista ou en grupo en proxectos de música antiga, contemporánea, jazz ou popular cos que ten chegado a actuar por toda Europa, América ou norte de África realizando tamén traballos para teatro, cine ou tv.

Na actualidade podémolo escoitar a dúo co guitarrista Pablo Carrera no seu proxecto mais persoal chamado 2uS e co cal ven de editar o segundo traballo discográfico, reinterpretando musica galega co Cuarteto Caramuxo, acercándose ó rock e á world music coa Banda Crebinsky ou dirixindo e tocando na Orquestra de Música Espontánea de Galicia (O.M.E.GA.) ademais de participar como colaborador en moitos traballos discográficos como os de Mercedes Peón entre outros.

Toda a súa bagaxe musical serve de base na súa faceta como docente onde traballa como profesor de música de ensino secundario no IES Salvaterra de Miño realizando gravacións discográficas e audiovisuais cos seus alumnos.

A versatilidade como instrumentista permítelle tocar todos os instrumento da familia do clarinete e así podémolo escoitar tocando un chalumeau ou un clarinete do S. XVIII ata os modelos mais modernos da familia como o clarinete baixo ou o contrabaixo.

Como investigador centra o seu interés no papel do clarinete na música popular galega, nomeadamente nas murgas e nos cuartetos de principios do século XX onde este instrumento facía dúo coa gaita xunto a tambor e bombo. A súa investigación sobre Os Trintas de Trives semella un paso lóxico neste proceso de investigación que agarda ser en breve o argumento principal da súa tese de doutoramento en etnomusicoloxía na Universidad de Valladolid.